Mundart: Un D Welt drait sich wittersch – Alemannisches von Stefan Pflaum STADTGEPLAUDER | 23.08.2026 | Stefan Pflaum
Der Mundartautor aus Schallstadt über Wortungetüme und das schönste Blau
Jo, des stimmt, aber sie drait sich in d falsch Richtung. S hört nit uff mit umstrittene Reformplän bi uns, un nit mit Drohunge un kriegerische Aktione weltwitt. Un nit mit Wescht-Oscht- bzw. Oscht-Wescht-Spannunge. Russland un China welle sich waffetechnisch un militärstrategisch zämmeduen zuenere neije „Gefechtsfeldkommunikationsinfrastruktur“. Do macht eim jo schu ällei des Wortungetüm Angscht. D Chinese könne de Russe ä Drohnetyp anbiete, wo während em Flug noch ä anders Flugziel anpeile kann. Chinese un Russe treffe sich un s goht um Luftverteidigung, also Raketeabwehrsyschteme un Frühwarnradare. Un was mache d USA und was d Europäisch Union? Berate, berate, Lösunge ankündige, wider verwerfe un sich selber über de grüne Klee lobe. Armi Ukraine! Russland un China hen ä 4200 Kilometer langi gemeinsami Grenz. Aber nit numme die isch gmeinsam. Was mache mir eigentlig bi größere Cyberangriffe gege ne Nato-Mitgliedsstaat. Isch sell dennoo ä Nato-Bündnisfall?
Aber losse mr d Weltpolitik. Ich hab die Woch im Gaarte ä Libell uffeme Eibezwiigli in de Sunn hucke sähne im schönschte Blau vun de Welt und zwei Schmetterling mit prachtgelbe Flügel, wo um si rum Ballett gfloge sin. Un schun hab i des Tohuwabohu vergesse un bin dankbar defür, weiß aber nit, wie lang.
